Hugsar nokon Boktras-kurset fylkesbiblioteket hadde i fjor på Skei? Så langt veit vi om to kommunar som har følgt opp kurset og starta bibliotekfilial i barnehagar.

Sogndal bibliotek har gjort ein flott innsats og opna filial i fire barnehagar. Pressa har dekka saka, og ein kan lese litt om filialane på nettsidene deira.

At Jølster bibliotek også har fått filialar i barnehagar er kanskje ikkje like kjent. Nyleg var eg i kontakt med Grete i Jølster og fekk høyre om jobben ho gjer i forhold til barnehagane.

Ho har altså opna filial i tre barnehagar, er veldig nøgd med resultata og har stor glede av å jobbe med dette. Ungane og foreldra låner mykje bøker. Biblioteket har klart dette utan å få ekstra midlar til tiltaket. Grete bruker av det ho har av biletbøker. Ho har også prioritert innkjøp av nye titlar i denne sjangaren.

No lurer vi på om det er andre bibliotek i fylket som gjer liknande gode tiltak i all løyndom? Om så, send oss ein e-post så legg vi det ut på bloggen.

Anne Sagen

På Kulturnett Sogn og Fjordane ligg det no ei nettutstilling laga av fylkesbiblioteket med bilete frå turen med bokbåten i haust. Sjå meir her: http://bit.ly/4CGMCN

Bente Lund

Vi har tidligare tipsa om Nynorsksenteret som har fått oppdaterte nettsider (sjå innlegg lenger ned på sida). Eg vil nytte høve til å forklare kvifor denne sida og ei anna side, ønskebok.no, er viktige ressursar som både lærarar og bibliotekarar med fordel kan nytte i sitt arbeid.  

I arbeid med litteraturformidling til barn og unge, er mi erfaring at det er to aldersgrupper som treng litt ekstra med tips og rettleiing.

For barn i ”slukealder” 9-13 år kjem det masse flotte bøker og mange ungar veit kva dei vil ha. Utfordringa kan vere å finne noko til barn rundt skulestartalder, og til ungdom på øvste trinn som held på å vekse frå ungdomsbøker.

På sidene ”Les for meg” til nynorsksenteret finn ein tematiske lesetips for barn rundt skulestartalder. Her er tipsa delt inn i seks kategoriar og ved å trykke på plussteiknet får ein fram fleire underkategoriar.

Til dømes under kategorien ”Relasjonar” vil ein finne underkategorien ”Besteforeldre”. Trykk på plussteiknet og du vil få utfyllande lesetips med tittel, format og sidetal. Trykk på minusknappen for å gå tilbake i menyen.
Sjå sida her: http://www.nynorsksenteret.no/index.php?ID=13457

Ønskebok.no har ikkje barnebøker i sin base, men svært mange omtalar av bøker som passar for ungdom og unge vaksne. Dette er ei litt annleis side kor ein veljar bok etter humør og stemning.

Som det står å lese på sida deira: ”ønskebok er ein intuitiv måte å søkje etter bøker på, basert på lesaranes eigne erfaringar og personlege val.”

Eit døme: eg sette pila mot kategoriane ”truande”, ”lett” og ”uvanleg” og søkte så etter nynorske bøker. Då fikk eg som ”Beste treff” Svart kalv@kvit snø av Hans Sande.

Ein får også tips om liknande bøker og filmar. Som ”godt treff” fikk eg Eg var der: historier vi ikkje må gløyme av Gudrun Pausewang. Sjå sida her: http://www.onskebok.no/

På ønskebok.no kan ein også velje kriterium for hovudpersonen (kjønn, alder, legning), handling (generasjonar, suksess mot alle odds) og stad. Vidare kan ein velje om ein vil ha boka på bokmål, lydbok eller som film.

Onskebok.no og nynorsksenteret.no er begge gode reiskapar å bruke i formidlinga.

Bente Lund

Laurdag 14. november er det nasjonal speldag, Spilldag 09, i biblioteka. Gloppen folkebibliotek har meldt seg på.

Initiativet bak tiltaket er først og fremst teke av ABM-Utvikling for å stimulere til bruk av dataspel i biblioteka. Her er den offisielle bloggen: http://spilldag.no/

Her i fylket har Gloppen folkebibliotek meldt frå om at dei laurdag 14. november legg til rette for at brukarar kan halde på med dataspel i biblioteket.  

“Då vert det sportsspel på Wii i eventyrrommet, Knerten-spel på PC, racingspel med racingstolar i foajéen, PS3 Rockband i kinosalen og så har vi to stk. Nintento DS til dei som ventar på å kome til.

Deretter satsar vi på ein fast speledag i veka, torsdagar kl. 15-18. Då vert det Wii i eventyrrommet og DS-speling. Vi har ikkje PS2/PS3 sjølve enno, men samarbeider med ungdomssklubben Blakken på speledagen”, opplyser Ann-Kristin Fløtre ved Gloppen folkebibliotek. 

Lista over deltakande bibliotek: http://spilldag.no/deltagende-bibliotek/

Biblioteksentralen har no forhandla fram avtalar med mesteparten av dei norske leverandørane av dataspel, og desse kan kjøpast og lånast ut ved bibliotek. Sjå informasjon frå BS her: http://bit.ly/2mOfN1

Denne konkrete satsinga på å stimulere til bruk av dataspel i biblioteka er eit samarbeid mellom “ABM-utvikling, Stavanger bibliotek, Norges informasjonsteknologiske høgskole og Drammensbiblioteket”, heiter det i den offisielle bloggen.

Det heile har også føringar frå stortingsmeldinga Dataspill frå 2007:  http://bit.ly/1l2YyU

Robert Haugen

Nye nettsider ved Nynorsksenteret i Volda om bøker på nynorsk, om lesing, bokmeldingar og om lese -og språkutvikling for born og ungdom: http://www.nynorsksenteret.no/lesformeg/

Robert Haugen

Om ikkje lenge skal samsøk for biblioteka i Sogn og Fjordane vera klart til bruk. Samsøket vil både gi betre tilbod for brukarane og for oss tilsette.

Neste steg vert å få på plass transportordning, slik at ein får ein grei flyt av mediasamlingane.

Men det bør understrekast at fjernlån skal vera eit supplement til samlingane i biblioteka og ikkje ei erstatning for manglande ressursar lokalt.

Fjernlån er ressursdeling og skal sikre felles tilgong til landets samla bibiotekressursar for alle som bur i landet. Bøker som er tilgjengelege til heimlån i eit bibliotek skal også vera tilgjengelege for brukarane ved andre bibliotek gjennom fjernlånssamarbeid.

I praksis har utviklinga ført til at dei “aller” fleste folkebibliotek no tek ansvar for sine eigne fjernlån og tingar disse direkte utan å gå vegen om fylkesbiblioteket.

Noregslånet gjer det og etterkvart mogleg for brukarane å bestilla det dei vil ha kor som helst i frå og få det sendt til det biblioteket som dei vel ved bestilling.

Ágúst Magnusson

Satsing på utvikling av modellbibliotek og lokalt biblioteksamarbeid vil få støtte. Det syner dagens framlagte statsbudsjett for 2010.

Sitat frå  Kultur -og kirkedepartementet til statsbudsjettet som blir lagt fram no:

“58,0 millioner kroner i økning til bibliotek, språk og litteratur
Med dette budsjettet er gjennomføringen av tiltak i bibliotekmeldinga godt i gang. Regjeringen foreslår å øke tilskuddet til Nasjonalbiblioteket med om lag 22,5 millioner kroner bl.a. til etablering og drift av en norsk språkbank, oppfølging av digitalisering av samlingene, videreføring av prosjektet Bokhylla.no og utvikling av nasjonalt biblioteksøk. Innkjøpsordningen for sakprosa økes med 2,5 millioner kroner. Til sammen økes innkjøpsordninger og produksjonsstøtteordninger under Norsk Kulturråd med 10 millioner kroner til 150 millioner kroner. Støtteordninger for lokalt biblioteksamarbeid og modellbibliotek innføres.” (tre siste setningane utheva av R. Haugen)

Det ser ut som at regjeringa i allefall har teke forslaga om modellbibliotek og biblioteksamarbeid frå stortingsmedlinga om bibliotek til følgje, og opna for å stø slike tiltak med midlar frå 2010 av.

Om modellbibliotek seier vedteken stortingmelding, Bibliotek : Kunnskapsallmenning, møtestad og kulturarena i ei digital tid (2008 : 2009), http://bit.ly/QHzSP http://bit.ly/gihiE følgjande:

“Kultur- og kyrkjedepartementet vil vidareutvikle biblioteka som offentleg møtestad, og arbeide for å synleggjere og framheve folkebibliotek med god funksjonalitet, møtestadfunksjon og gode partnarskap. Ei ordning med modellbibliotek vil verte etablert.” Sjå meir her http://bit.ly/1b1gli

Om lokalt biblioteksamarbeid seier vedteken stortingmelding, Bibliotek : Kunnskapsallmenning, møtestad og kulturarena i ei digital tid (2008 : 2009) følgjande i kapittel ”9 Organisering og drift av bibliotektenester lokalt og regionalt”.

• “Kultur- og kyrkjedepartementet vil stimulere til samarbeids- og samordningsløysingar i biblioteknettverket lokalt og regionalt. Målet er å prøve ut ulike organisasjonsmodellar, og gje rom for kreativ og fleksibel utprøving med basis til dømes i vertskommunemodellen.
• Det vil bli etablert ei ordning med friviljuge samarbeidsavtaler om bibliotekutvikling mellom staten og fylkeskommunane som verktøy for å gjennomføre nasjonal politikk og stimulere til fylkeskommunale og kommunale bibliotekplanar.”

Sjå heile kapittel 9 i stortingsmeldinga om bibliotek her: http://bit.ly/QHzSP:

Nettsida til Kultur -og kirkedepartementet: http://bit.ly/qiGrY

Nettsida til Regjeringa og statsbudsjettet: http://bit.ly/qiGrY http://bit.ly/3BPXkj 

Robert Haugen

Herta Müller frå Romania, busett i Tyskland dei siste 22 åra, vart i dag utnemnt til mottakar av Nobelprisen i litteratur 2009, sjå omtale i Dagbladet: http://bit.ly/25edDs 

Lenkjer til bøker på norsk av Müller og informasjon om prisvinnaren:

* Sambok, Nasjonalbiblioteket: http://bit.ly/1MYWjW 

* Wikipedia: http://no.wikipedia.org/wiki/Herta_M%C3%BCller

* Store Norske Leksikon: http://www.snl.no/Herta_M%C3%BCller

* Nobelprisen: http://nobelprize.org/nobel_prizes/literature/laureates/2009/

* Aftenposten: http://www.aftenposten.no/kul_und/litteratur/article3309667.ece

Robert Haugen

Veslebror ser deg er ei ny, aktuell bok for ungdom (i alle aldrar) på nynorsk som bør vere i samlinga. Forfattar er Cory Doctorow, den er omsett av Øystein Vidnes og utgjeven på Samlaget.

Halve boka er tilgjengeleg på nettsida til forlaget:

http://www.samlaget.no/item.cfm?path=&id=14690

Doctorow er sterk tilhengjar av fri tilgong og deling på internett. Handlinga i spanande med ungdom som hovudperson, og tek føre seg IKT, internett, datatryggleik og det teknologiske samfunnet.

Robert Haugen

Denne uka var eg så heldig å få møte ein del skulebibliotekarar frå Førde-skulane i samband med ein presentasjon av Kulturfond-bøker for barn og unge på Førde Bibliotek. Der blei det etterlyst fleire lettleste bøker på nynorsk. Dessverre er det nok slik at det kjem ut alt for få bøker på nynorsk som er lettleste.

Samlaget hatt tatt grep og gir ut Komet-serien, som er fire seriar basert på ulike alderstrinn. Les meir om Komet-serien her:http://www.samlaget.no/section.cfm?path=13,40

Dei populære seriane Leseløve (Cappelen Damm) og Lesehesten (Aschehoug) har nokre få titlar på nynorsk:

Leseløve inneheld medan andre bøkene om Kasper og bøkene om Stian av Jørn Jensen. Ellers har serien bøker om fotballlaget Knoterud FK av Lars Mæhle, bøkene om Frans av Christine Nøstlinger og to bøker av Hans Sande, kor den eine ”Er du blind i dag, Elise?” er ny i år og bestilt inn av fylkesbiblioteket. Vi har også nokre av desse bøkene som klassesett.

I serien Min første leseløve (med blokkbokstaver) er det berre to bøker på nynorsk: Stian på Sirkus av Jørn Jensen og Vers på tvers av Finn Øglænd.

Når det gjelder Lesehest-serien har den tre bøker på nynorsk: Fuglefangartreet av Torvald Sund, Den gongen eg liksom-døydde og Pluselig ville eg ikkje laga dorull-dyr lenger, begge av Bjørn Sortland.

Ei nyttig side om lettleste bøker er Leser søker bok si heimeside kor ein kan søke etter tilrettelagte bøker (boksøk.no):

http://www.boksok.no/

Ein veldig flott oversikt over lettleste bøker ligger ute på Issuu og er laga av Rolf Steinar, bibliotekar ved Lindesnes bibliotek. Sjå presentasjonen her:http://issuu.com/rolfsteinar

Issu verkar forøvrig til å vere eit glimrande reiskap for å publisere eigne skriftlige materiell. Kanskje noko for biblioteka å tenke på?

Bente Lund